ਵੀਆਈਪੀ ਇਲਾਕਾ ਵੀ ਡੁੱਬਿਆ ਪਾਣੀ ਵਿੱਚ
ਬਠਿੰਡਾ ਵਿੱਚ ਰੁੱਕ ਰੁੱਕ ਕੇ ਹੋ ਰਹੀ ਬਰਸਾਤ ਨਾਲ ਜਿੱਥੇ ਸਾਰਾ ਸ਼ਹਿਰ ਹੀ ਜਲਥਲ ਹੋ ਗਿਆ ਹੈ, ਉਥੇ ਹੀ ਇਸ ਬਰਸਾਤ ਦੀ ਮਾਰ ਵਿੱਚ ਵੀਆਈਪੀ ਇਲਾਕਾ ਵੀ ਆ ਗਿਆ ਹੈ। ਆਈਜੀ, ਐਸਐਸਪੀ, ਡੀਸੀ, ਸੀਨੀਅਰ ਡਿਪਟੀ ਮੇਅਰ ਦੀ ਰਿਹਾਇਸ਼ ਨਜ਼ਦੀਕ ਕਈ ਕਈ ਫੁੱਟ ਪਾਣੀ ਖੜ੍ਹ ਗਿਆ ਹੈ। ਇਸ ਦੇ ਬਿਨ੍ਹਾਂ ਸ਼ਹਿਰ ਵਿੱਚ ਜਿੱਥੇ ਆਵਾਜਾਈ ਪ੍ਰਭਾਵਿਤ ਹੋ ਰਹੀ ਹੈ, ਉਥੇ ਹੀ ਆਪਣੇ ਰੋਜ਼ਮਰ੍ਹਾਂ ਦੇ ਕੰਮਾਂ ਲਈ ਲੋਕਾਂ ਨੂੰ ਜਾਣਾ ਔਖਾ ਹੋ ਗਿਆ ਹੈ।
ਇਸ ਦੇ ਨਾਲ ਹੀ ਜਿੱਥੇ ਪਿਛਲੇ ਹਫਤੇ ਤੱਕ ਤਾਪਮਾਨ 35 ਤੋਂ 38 ਡਿਗਰੀ ਸੈਲਸੀਅਸ ਚੱਲ ਰਿਹਾ ਸੀ, ਉਥੇ ਹੀ ਹੁਣ ਘੱਟ ਕੇ ਵੱਧ ਤੋਂ ਵੱਧ ਤਾਪਮਾਨ 27.4 ਅਤੇ ਘੱਟ ਤੋਂ ਘੱਟ ਤਾਪਮਾਨ 24.6 ਰਹਿ ਗਿਆ ਹੈ। ਇਸ ਬਰਸਾਤ ਦੇ ਨਾਲ ਹੀ ਤਾਪਮਾਨ ਹੇਠਾਂ ਚਲਾ ਗਿਆ ਹੈ। ਇੱਥੇ ਦੱਸਣਯੋਗ ਹੈ ਕਿ ਪਿਛਲੇ ਕੁੱਝ ਦਿਨਾਂ ਤੋਂ ਲਗਾਤਾਰ ਰੁੱਕ ਰੁੱਕ ਕੇ ਬਰਸਾਤ ਹੋ ਰਹੀ ਹੈ ਅਤੇ ਸ਼ਹਿਰ ਦੇ ਨੀਵੇਂ ਇਲਾਕਿਆਂ ਵਿੱਚ ਪਾਣੀ ਜਮ੍ਹਾਂ ਹੋ ਰਿਹਾ ਹੈ।
ਇੱਕ ਪਾਸੇ ਆਮ ਲੋਕ ਕਈ ਕਈ ਫੁੱਟ ਖੜ੍ਹੇ ਪਾਣੀ ਦੀਆਂ ਦਿੱਕਤਾਂ ਨਾਲ ਦੋ ਚਾਰ ਹੁੰਦੇ ਰਹੇ, ਉਥੇ ਹੀ ਮਹਿਲਾ ਥਾਣਾ ਵਿੱਚ ਪਤੀ, ਪਤਨੀ ਦੇ ਚੱਲ ਰਹੇ ਝਗੜਿਆਂ ਦੇ ਮਾਮਲਿਆਂ ਦਾ ਪਿਆ ਸਮਾਨ ਵੀ ਥਾਣੇ ਵਿੱਚ ਖੁਲ੍ਹੇ ਆਸਮਾਨ ਹੇਠਾਂ ਮੀਂਹ ਵਿੱਚ ਗਿਲਾ ਹੁੰਦਾ ਰਿਹਾ। ਮਹਿਲਾ ਥਾਣਾ ਦੇ ਸਾਹਮਣੇ ਜਮ੍ਹਾਂ ਹੋਏ ਪਾਣੀ ਕਾਰਣ ਅੱਜ ਥਾਣੇ ਵਿੱਚ ਆਮ ਲੋਕਾਂ ਨੂੰ ਪੁੱਜਣਾ ਵੀ ਮੁਸ਼ਕਿਲ ਹੋ ਗਿਆ।
ਦੂਜੇ ਪਾਸੇ ਸਕੂਲਾਂ ਵਿੱਚ ਮਨਾਏ ਜਾ ਰਹੇ ਅਧਿਆਪਕ ਦਿਵਸ ਦੌਰਾਨ ਵੀ ਬੱਚਿਆਂ ਦੀ ਇਸ ਮੀਂਹ ਪੈਣ ਦੇ ਕਾਰਣ ਗਿਣਤੀ ਘੱਟ ਦਿਖੀ ਅਤੇ ਮੀਂਹ ਕਾਰਣ ਕਈ ਬੱਚੇ ਸਕੂਲ ਨਾ ਪੁੱਜੇ। ਜੋ ਬੱਚੇ ਸਕੂਲਾਂ ਵਿੱਚ ਗਏ ਉਹ ਵੀ ਮੀਂਹ ਨਾਲ ਪੈਦਾ ਹੋਈਆਂ ਮੁਸ਼ਕਿਲਾਂ ਨਾਲ ਜੱਦੋ ਜਹਿਦ ਕਰਦੇ ਹੋਏ ਸਕੂਲ ਪੁੱਜੇ।
ਨਗਰ ਨਿਗਮ ਦੇ ਕਮਿਸ਼ਨਰ ਦਲਵਿੰਦਰ ਜੀਤ ਸਿੰਘ ਨੇ ਸੰਪਰਕ ਕਰਨ 'ਤੇ ਦੱਸਿਆ ਕਿ ਨਗਰ ਨਿਗਮ ਮੁਲਾਜ਼ਮ ਮੀਂਹ ਦੇ ਸ਼ੁਰੂ ਹੋਣ ਉਪਰੰਤ ਹੀ ਪਾਣੀ ਦੀ ਸ਼ਹਿਰ ਵਿੱਚੋਂ ਨਿਕਾਸੀ ਕਰਨ ਦੇ ਕੰਮਾਂ ਵਿੱਚ ਲੱਗ ਜਾਂਦੇ ਹਨ ਅਤੇ ਲਗਾਤਾਰ ਸ਼ਹਿਰਾਂ ਵਿੱਚ ਪਪਿੰਗ ਰਾਹੀਂ ਨਿਕਾਸੀ ਕਰਨ ਵਿੱਚ ਜੁੱਟੇ ਹੋਏ ਹਨ। ਬਰਸਾਤ ਲਗਾਤਾਰ ਹੋਣ ਦੇ ਕਾਰਣ ਅਜਿਹਾ ਹੋ ਰਿਹਾ ਹੈ ਅਤੇ ਜਦ ਹੀ ਇਹ ਬਰਸਾਤ ਰੁੱਕਦੀ ਹੈ ਤਾਂ ਉਸ ਦੇ ਕੁੱਝ ਸਮੇਂ ਤੱਕ ਹੀ ਸਾਰਾ ਪਾਣੀ ਨਿਕਲ ਜਾਵੇਗਾ। ਪਾਣੀ ਦੀ ਨਿਕਾਸੀ ਲਈ ਲਗਾਤਾਰ ਕੋਸ਼ਿਸਾਂ ਚੱਲ ਰਹੀਆਂ ਹਨ।
No comments:
Post a Comment